دلوقتى احنا فى تانى يوم صيام ومعلهش هأخر شوية المطلب الجماهيرى فى رمضان وهو البط لغاية ما المعدة تتعود على الصيام
ومن الاكلات الشهية والمفضلة للجميع " المحشى "
واخترت لكم اخف نوع من المحاشى على المعدة وهو محشى الكوسة وهو خفيف فعلا على المعدة وسها الهضم نظرا لخصائص الكوسه الهاضمة
وطبعا احنا محتاجين شوربة علشان نشربها مع الاكل فقلت الفراخ اخف حاجة وشوربتها لذيذة
اولا : محشى الكوسه على الطريقة الصح
المقادير :
2كيلو كوسة متوسطة
2كوب ارز مصرى مغسول ومنقوع
عدد 2 بصلة كبيرة مقطعة ناعم
حزمتين بقدونس+حزمتين شبت مغسولين ومقطعين ناعم
6 فصوص ثوم مفرومين
حبة فلفل حامى ( حسب الرغبة) مقطع ناعم
عصير طماطم حمراء
2 ملعقة صلصة طماطم
بهارات محشى ( فلفل اسود+كمون+رشة جوزة الطيب+ نعناع + بهارات لحم )+ مكعبين مرقة دجاج
وممكن اضافة نصف كيلو لحم مفروم او مقطع وده حسب الامكانيات
الطريقة :
اولا تغسل الكوسى ويتم ازالة القشرة الخارجية ( يعنى نجريها) ثم نقور الكوسة ونغسلها ثانى ونصفيهامن المياه
نضع حلة كبيرة على النار وفيها شوية زيت وملعقة سمن بلدى
2- نضع البصل ومعه الفلفل الحامى ولما يذبل شوية نضيف اللحمة ونقلبها شوية
3- نضيف البهارات وما ننساش الملح لكن ما نكثرش منه علشان هانظبطه فى الاخر
4- نضيف عصير الطماطم وملعقتى الصلصة والثوم المفروم ونسيبهم لما عصير الطماطم يتسبك
5- نضيف الارز والبقدونس والشبت ونقلب بخفة لغاية الارز ما يشرب عصير الطماطم
6- نرفع الحشو من على النار ولما يهدأ نحشى الكوسة وما ندفسهاش قوى علشان ما تتشققش
7- نضع فى قعر الخلة التى سيتم طبخ المحشى فيها لب الكوسة اللى سبق وشلناه من داخلها ومعاه طرنشات طماطم حتى لا تتلسع
8- نرص الكوسة فى الحلة ونسكب فوقها عصير طماطم مخفف فيه عليه رشة ملح وفلفل اسود خفيف
ونضعها على نار خفيفة حتى تستوى
وممكن اضافة فليفلة خضراء مع الكوسى ويتم حشوها وتوضع معها فى نفس الحلة لاكسابها طعم وريحة حلوييين قوى
وبالهنا والشفا
ثانيا : الفراخ المحمرة اللذيذة
المقادير : فرخة مغسولة كويس جدا بالملح والدقيق
ملعقة صغيرة سمن بلدى ( يفضل يعنى)
بصلة كبيرة
2 فص حبهان مفتوحين
2 فص مستكة
ورق لاورو
الطريقة :
نضع الحلة على النار ولما تسخن نضيف السمن
لما السمن يقدح يعنى يسخن نضيف المستكة والحبهان
لما تطلع ريحة المستكة والحبهان نضيف وبسرعة الفرخة ومعاها البصلة ونقفل الغطا عليها بسرعة حتى تتداخل الرائحة جوه الفرخة
ثم نصب فوق الفرخة مياه مغلية حتى تغطيها تماما ولاحظى انى لم استخدم مياه باردة حتى تكون الشوربة بيضاء وزى الفل
ونضيف الملح ووورق اللاورو ونتركها تغلى حتى تستوى
ونطلع الفرخة ونحمرها
ونصفى الشوربة بالمصفاة لنحصل على شوربة فراخ جميلة
وممكن عمل شعرية عليها
وبالهنا والشفا
والحلو النهاردة :بلح الشام اللذيذ
ليست هناك تعليقات:
إرسال تعليق