كلنا عارفين النخاع او بالمصرى " البهاريز" والتى تكون موجودة بداخل العظام سواء بقرى او جاموسى
وكلنا لما بنروح نشترى لحمة بنطلب من الجزار انه يزود ماسورة يعنى قطعة من العظام وبداخلها النخاع علشان بيعطى دسامة وطعم حلو قوى لشوربة اللحمة
وكثير يعرفوا فائدة النخاع للشعر طبعا من اسماء حمامات الكريم اللى بيكون اسمها " بالنخاع"
ولكن تعرفى يا ست يا عايقة انك ممكن تستخرجى النخاع الطبيعى وتستعمليه وهايديكى نتيجة فوق ما تتصورى من نعومة وجمال وانسيابية ؟؟؟
ولكن ازاى:
انا قاقولك طريقة استخراج النخاع الصحيحة من العظام واعطيك الوصفة الصح لاستخدامه بس تدعيلى.
اولا : استخراج النخاع او البهاريز
بتروحى عند الجزار وتطلبى منه ماسورة عظم وممكن لو كان جزار معرفة يديهالك ببلاش وإلا هاياخد مبلغ بسيط
وتطلبى منه انه يخرج ليكى النخاع ولكنى افضل انك تطلعيه بنفسك علشان ماتسيبيش فتفوتة منه
تروحى للبيت وتولعى فرن البوتاجاز وتلما يسخن تهدى النار وتضعى الماسورة داخل صينية وتدخليها الفرن
ولما تلاقى الزيت بدأ يطلع من العظمة تخرجى الماسورة وتخبطيها على الصينية بالطول هاتلاقى البهاريز تطلع على طول والا تدخليها كمان شوية الفرن
وبذلك تحصلى على النخاع واوعى ترمى الزيت لانه مهم ايضا.
ثانيا : الطريقة الصحيحة لاستخدام النخاع:
تسيحى النخاع على نار هادئة حتى يتحول كله الى زيت ثم تضيفى:
لكل ملعقة كبيرة من النخاع السائل نضيف ملعقة عسل نحل وملعقة زيت شعر ( زيتون او لوز او ذرة) المفضل عندك
وتضعى الخليط على شعرك وتغطيه بفوطة ساخنة وكل ما تبرد تسخنيها
او تستعملى بونيه الحمام البلاستيك حتى يحبس الحرارة على شعرك
وطبعا اثناء دهنك للخلطة اهتمى بفروة الرأس واطراف الشعر لحمايتها من التقصف
وبعد حوالى ساعة اشطفى شعرك بماء ساخن هاتلاقى النخاع بيسيل وينزل منها على طول
وممكن تستخدمى شوية شامبو صغيرين قوى بحيث تتركى اثر ولو بسيط جدا على شعرك
هاتلاقى فرق كبييير
وعلى فكرة قرأت ان الكثير من الممثلات مثل سمية الخشاب تواظب على عمل هذا الحمام الكريمى لشعرها اسبوعيا وطبعا كلنا عارفين جمال شعرها .. ما شاء الله لا قوة الا بالله
وما تنسيش تدعى لى
ليست هناك تعليقات:
إرسال تعليق